--Dandang Cemong---

Somad pemude atu-atunya yang punye gaye selangit, katenye sih die begitu biar jadi pemude gaul. “biar kaga ketinggalan jaman gituh”, begitu deh jawaban si Somad kalo ditanye ame orang – orang atu kampung. Malem minggu kali ini neh si Somad udah nyentrik banget. Pake topi koboi, sepatu kulit, baju kaos rumbai – rumbai, rompi kulit ma sapu tangan belang-belang, kaga lupa juga dia pake gelang ma kalung-kalungan. Tapi biar dikata Somad udah nyentrik abis kaya gitu. Ampe sekarang si Somad belom juga puas punya pacar. Kebetulan dari kemaren si Somad udah ngincer si fatimeh. Anak Haji Dalih kampung seberang. Bodinye sih kaga seberapa kalo dibandingin ama si liza, perawan bohay kembang desa kampungnye si Somad. Apalagi kalo dibandingin ama si tini perawan ujung gang anaknya pak narjih, apalagi, busyetdah banyak kalo disbanding –bandingin. Tapi Somad yang udeh dicap jadi playboy cap sendok garpu belom pernah dapetin cewe yang punye gaye kaye si fatimeh, makanye si Somad bela-belain malem minggu kali ini ninggalin pacarnye yang udah selusin buat dapetin gebetan nyang atu ini.
Rumah si Fatimeh udeh keliatan di ujung mata, si Somad udeh ngebayangin kalo si Timeh bakal buka pintu, pake jilbab kembang-kembang trus dari mukanye keluar dah tuh cengiran yang bikin ati jadi kaga ada juntrungannye, pas si somad makin deket tapaknye ama rumah si timeh keliatan deh tuh babehnya si timeh yang terkenal galak, alias pak haji dalih lagi ngupi ama ngerokok sambil baca kitab didepan bale rumahnye.
“ waduh celaka tiga belas nih, babehnya malangin pintu lagi!” si Somad bingung tampangnya langsung berubah jadi keki. tapi boleh juge nih otak si Somad, biar udeh kepepet kaga keabisan akal barang sejengkal. Die keluarin cepe-an dari kantong terus die masukin ke telepon coin sambil mencet nomor teleponnye si Fatimeh.
“ hallo, assalamu’alaikum, nyak. Timeh nya ada nyak?” kata si udin nyoba nanya
“ wah, kebeneran si Timeh lagi benerin dandang nyak di bengkel besinya bang uddin, emang nih siape?” balik nyaknye timeh nanya.
“calon mantu nyak, makasih ye nyak wassalamu’alaikum” si Somad maen nyerocos aje.
Wah bengkel besinya mang uddin mah di depan, nah kalo begitu si timeh pasti lewat sini nih. Si somad udeh ngebayangin aje ape nantinye yang die lakonin kalo si timeh lewat. Sambil ngebayangin, si somad ngeluarin obat ganteng paling paten dari kantongnye. di sisir dah tuh rambutnya ampe kaya abis di gosok, liciiiin banget.
Dasar kebon emang nyamuknya sebakul belom ape-ape udeh disuruh nyumbang darah gue. “Hah” si Somad ngeluarin napas persis kaya di sinetron - sinetron, Timeh biar kata abang mesti nyumbang darah lima gallon, ama nih nyamuk kebon, abang jabanin, timeh. Aduh pengen punye pacar yang model beginian kudu banyak pengorbanannya. Tadi babehnye, sekarang nyamuk kebon, ntar apa lagi ye! Begitu deh cletukan si Somad dalem atinye.
Kaga berape lama si somad nongkrong si timeh lewat bawa dandang pesenan nyak-nye, si somad beraksi langsung manggil si timeh. Si timeh kaget di kira dedemit dari mane malem-malem gini manggil die. Wal hasil dandang cemong pesenan mak-nye si timeh nemplok kemukenye si somad playboy cap sendok garpu, mukanye jadi lucu, si timeh ketawa, si epih temennye si timeh ketawa si somad juge ikutan ketawa lantaran malem minggunye kali ini kena dandang cemong pesenan nyak-nye si timeh.
_____
pandi merdeka nurdiansyah